Boletin 9. 2006 urteko ekaina
Finantza-zerbitzuen arazoak eta ustezko konponbideak.

Gure asmoa ez da banka guztia kriminalizatzea. Kontsumitzaileen elkarteok hiritarren kexak jasotzen ditugu, hitzartutakoa betetzen ez delako. Hala ere, erakunde guztiek ez dute berdin jokatzen, eta, era berean, alde handiak ere badaude erakunde bereko agentzien artean.

ERABILTZAILEEN BEGIRUNEZKO JARRERA BANKARI DAGOKIONEZ

Gertatzen diren arazoetan, kontsumitzaileak berak dauka erantzukizun handienetakoa, gehienetan konfiantza itsua daukagulako banka-sisteman. Hain zuzen ere, gure diru-sarrerak utzi ditugu beraren esku, soldata eman diogu (gehienetan, ordaintzailearen aginduz), gure ordainketak kudeatzen ditu eta gure aurrezkiak administratzen ditu, guk ezer eskatu gabe eta beti-beti gutxiagotasunezko jarreran egonda. Beharbada ez dugu kontuan hartzen banka-sektoreak lortu eta etengabe hazten diren mozkin handi-handiak gure diruaz erdietsitako guztian dutela jatorria eta mozkin horiek ez direla bezeroen mesedetan erabiltzen, akziodunak izanik ere, erakundea kontrolatzen duten eliteen eskuetara doazelako.

ERABILTZAILEEN KEXAK

1.- INFORMAZIORIK EZA ETA/EDO ERAGIKETA GARDENAK

Informaziorako eskubidea antolamendu juridikoan, Kontsumitzaileen eta Erabiltzaileen Estatutuan jasotako oinarrizko eskubidea da, eta euren ekintzei buruz berme osoz hausnartzeko eta ekintzok betearazteko aukera eskaintzen die hiritarrei.

Eskubide horrek, gainera, garrantzi berezia dauka banka-sektorearekiko harremanetan, bankuko eragiketak zail samarrak direlako ezagutza-maila ertaina dutenentzat.

Batzuetan, kontsumitzaile ertainentzat ulertezina da sektorean erabiltzen den terminologia berezia. Ia-ia sinatzen diren artikuludun kontratu guztiak dira korapilotsuak, zailak eta luzeak, erabilitako letra txiki-txikia dela eta kontratuko plegu guztien azken orrialdean dagoela kontuan hartu barik.

Bankuko eragiketen zailtasunaren ondorioz, erakundeek ondo-ondo zaindu beharko lukete informaziorako eta eragiketa gardenetarako eskubidea, bankuko jarduna behar den modukoa izateko eta bezeroei kalitateko zerbitzua eskaintzeko. Zoritxarrez, bankuaren eta bezeroen arteko gardentasunik eza hain ohikoa denez, 5.000 kexa bideratu dira, Espainiako Bankuko Erreklamazio Zerbitzuaren 2004ko Txostenaren arabera.

BANKUKO KOMISIOAK

Orain arte, oso ezezagunak izan dira erabiltzaileentzat. Erabiltzaileek bankari egin diote presioa, kreditu-eragiketetako eta, neurri txikiagoan, eragiketa pasiboetako interesak hobeto ezartzeko eta, ez hainbeste, komisioen ezarpena negoziatzeko. Izan ere, azterlanen arabera, erabiltzaileen %15ek baino ez dakite zer komisio ezartzen dizkieten eta zenbatekoak diren.

EGOERA ETA KEXAK

Komisio gehiago ezartzea: saldo inaktiboak eta zenbateko txikikoak.
Komisioen zenbatekoa igotzea.
Espainiako Bankuaren 8/90 Zirkularra ez betetzea. Iragarki-taulan ikusgai ez jartzea edo informazioa oso-osorik ez agertzea.
Kontsumitzaileei tarifak aldatu baino bi hilabete lehenago informaziorik ez ematea.
Ordainagiriak ordutegi zehatz batean ordaindu behar direnez, helbideratu egin behar dira, eta, horren ondorioz, komisioa ordaindu behar da.

ORDAINAGIRIEN ORDAINKETA LEIHATILAN

Eragiketa egiteko ordutegia eta lanegunak mugatuta daudenez, ordainagiriak helbideratu behar dira, eta, horren ondorioz, komisioa ordaindu behar da.

KONTSUMORAKO MAILEGUEI BURUZKO INFORMAZIOA

Kontsumorako maileguak informaziorik ezaren edo informazio txarraren eredu dira. Mailegua saltegian edo zerbitzua kontratatzen den lekuan bertan bideratzen denez, ez da behar bezain zehatza, profesionala eta gardena.

HIPOTEKA-MAILEGUAK

Ez da eskaintza loteslearen berri ematen.
Bizi-asegurua inposatzen da.
Erakundearekin lotura daukan aseguru-konpainia inposatzen da.

BANKA ELEKTRONIKOKO ERAGIKETAK ETA ERAKUNDEAREN ERANTZUKIZUNA

Arazo guztiak erabiltzaileen arduragabekeriaren ondorioz sortzen ez direnez, bankuak erantzukizunaren zati bat hartu beharko luke bere gain, gutxienez.
Informazioa eta prebentzioa nahikoak izango ez balira, bankuen erantzukizuna ere izango litzateke.

Eragiketa bakoitzaren ostean SMS bat bidali beharko litzateke, beharrezkoa izanez gero, blokeatu ahal izateko.
Arazo handia da, erakundeak segurtasun-sistemak ahalik eta gehien garatzera behartzen dituen legezko eskakizunik ez dagoelako.

BEZEROAK ATENDITZEKO SISTEMAK

Bezeroak Atenditzeko Zerbitzua edo, erakunde batzuetan agertzen den bezala, Kalitate Zerbitzua barik, Erakundea Defendatzeko Zerbitzua dela esan beharko lukete.

Ez dago idatzizko erantzunik. Telefonoz jarri beharra dago harremanetan, eta, gehienetan, ez du gatazka konpontzeko balio.

ESPAINIAKO BANKUKO ERREKLAMAZIO ZERBITZUA

Bere erabakiak (gomendioak) lotesleak ez badira ere, zeresan handiko argudioak izan litezke, auziak argitzeko edo prozedura judizialetan erabiltzeko.
Tamalez, ebazpen gehienetan ez du ezer esaten gatazkaren helburu diren gaiei buruz.